Es Lied über ne gruusige, aber trotzdäm sehr erfougriche Soucheib. Rein fiktiv, es handlet sech auso sicher nid um Di!

---
Er het e Schnure wi ne Chue
Un es Füdle wi ne Waufisch
Er isch dumm wi ne Schtei
U hett chrummi Bei, chrummi Bei!
---
Er het es Brätt vor em Gring
U Haar uf de Zäng
Er chratzt sech geng em Füdle
U wäscht sech nie d Häng, wäscht sech nie d Häng
---
   Trotzdäm isch er nie allei
   Jedi nimmt ne gärn mi hei
   Du fragsch di itze äch wieso?
---
Er redt wi ne Esu
U fluechet wi ne More
Er het fettegi Haar
Un er grüblet i de Ohre, grüblet i de Ohre!
---
Er het abkätschti Negu
U gäubi Zäng
Er roucht wi nes Chemi
U het füechti Häng, füechti Häng
---
   Trotzdäm isch er nie allei
   Jedi geit gärn mit ihm hei
   Du fragsch di itze äch wieso?
   ---
   Er het Schtutz wi blöd, Chlüder wi ne more
   Gäud wi Höi, aus geng nöi
   Es riisigs Huus, u nes Ross im Schtau
    Es Chalet i de Bärge, un e Villa em Meer
   E grosse Chare un e Jacht uf em See
---
Tanze chan är nid
Un är louft wie nes Kameu
Macht aus für Gäud
U verchouft sogar si Seeu, verchouft sogar si Seeu
---
Maniere het är nid
U ner schpiut so gärn dr Boss
Er choderet a Bode
U schnürflet wie nes Ross, schnürflet wie nes Ross!
---
Är het e Gschmack wie ne Güderchübu
U schtinkt nach Schweiss
Er het es Doppuchini
Un er lachet wie ne Geiss, lachet wie ne Geiss!
---
   Trotzdäm isch er nie allei
   Jedi geit gärn zue nim hei
   Du fragsch di itze äch wieso?
   ---
   Er het Schtutz wi blöd, Chlüder wi ne more
   Gäud wi Höi, aus geng nöi
   Es riisigs Huus, un es Ross im Schtau
   Es Chalet i de Bärge, un e Villa em Meer
   E grosse Chare un e Jacht uf em See
---
Säg du mir, ja was wott me de meh?
E grosse Chare u ne Jacht uf em See
Säg du mir, ja was wott me de meh?
E grosse Chare u ne Jacht uf em See
---
Är isch feiss wi ne Muni
Un är schilet wi ne Bäse
Het e dicki Brülle
U cha gliich nid läse, cha gliich nid läse!
---
Wenn är öppis seit
Chunnt keni würklech druus
Aber jedi tuet eso
Aus säg er öppis schlaus
---
Är het e Schnure wi ne Chue
Un es Füdle wi ne Waufisch
Är isch dumm wi ne Schtei
...aber trotzdäm isch är nie allei!

.................................
(c) Pjotr Müller, 2015