Lämpe

Es Lied über ds Gschtürm ire müehsame Wohnumgäbig. Zum Glück nüt outobiografischs.

---
I sitze ufem Balkon - luege i Garte
Gseh Meyers näbe dran - di chöi scho fasch nümme warte
Bis i öppis mache, wo se villech stört
Eifach irgendöppis, wo sech haut nid ghört und
De chöme si cho ds liire, i söu mi zämenäh
So ne schlimme Nachbar - heigs hie no nie gä
Heigs hie no nie gä!
---
Schmids ihri Chatze - di bisle mir id Schueh
Das alleini - isch no nid gnue
Meiers ihre Lumpi dä schiist mr de no drii
Aber das isch no nid aues gsii
Wüu Gruebers ihri Giele, di tüe geng wi ne Sou
U chotze mir no d Schtifu vou - ou ou ou...
---
   Sit i hie wohne hani nüüt aus Lämpe
   Sit i hie wohne dräit sech aus im Kreis
   Aus won ig versueche geit irgendwie schief
   Sit i hie wohne bin i imene tief!


Ds Velo im Chäller - hei si mr o klauet
U ds Outo vor dr Huustür geschter grad verchrauet
Dr Giger dä Bünzli - er zündet mi no ah:
We's mr nid passt hie - de chönn ig ja ga...
Cha mache was i wott - i maches nie rächt
Wenn i dra dänke - de wird's mr widr schlächt
De wirds mr widr schlächt!
---
Itz chunnt o no d Frou Bürki - u seit si häbi gnue
I söü emau chli ruhig sii - u nid so schwierig tue!
Dr Abwart chunnt cho ds bäue - er packt mi a dr Hang
Im Schtägehuus heigs Fläcke - überau ar Wang
We das bis em Sunntig - nid suber sig bi Goscht
Bechöm i vor Verwautig - de iigschribni Poscht!
Iigschribni Poscht!
---
   Sit i hie wohne hani nüüt aus Lämpe
   Sit i hie wohne dräit sech aus im Kreis
   Aus won ig versueche geit irgendwie schief
   Sit i hie wohne bin i imene tief!


D Schtore chlemmt u ds Fänschter - das geit scho lang nümm zue
Ja vo dene Zueschtäng - hani langsam gnue!
Bim Baukon rägnets ine - dr Teppich isch geng nass
Alli wo mi bsueche - di finge das o krass!
Di Wohnig ja di schlat mr - sit langem uf e Mage
I chume mr vor - wi ds füfte Rad am Wage
Wi ds füfte Rad am Wage!
---
I gloub i gloub i chume - i chume nümm druus
Ligts a mir - oder a däm Huus?
I gloub i gloub i chume - i chume nümm druus
Ligts a mir - oder a däm Huus?
---
   Sit i hie wohne hani nüüt aus Lämpe
   Sit i hie wohne dräit sech aus im Kreis
   Aus won ig versueche geit irgendwie schief
   Sit i hie wohne bin i imene tief!


.......................................
(c) Pjotr Müller - 2015